Thursday, June 28, 2007

متضايقش نفسك




ايه اللي يضايق يعني . .

هتقعد في الكليه سبع سنين وتطلع تقعد على الرصيف . . عادي ما دي حالة ملايين الشباب في مصر على الاقل انت هتبقى قاعد على الرصيف برتبة دكتور

ولا تكونش متضايق عشان كنت بتحب واحده و هي قالتلك بلاش . . يا سيدي هي حره . .هو انت هتمشي الناس على مزاجك

ولا اوعى تكون متضايق ان ابوك مش مقدر مشاكلك . . بصراحه هو معاه حق ماهو انت بتستهبل غالباً . . وبعدين راعي فرق الاجيال برضه يعني الراجل معذور

ولا يعني متضايق عشان مشاكل ماديه . . ايه يعني كنت عايز حاجه وماجتش . . احمد ربنا غيرك مش لاقي ياكل

و اللي بجد مصدقش انو يكون مضايقك ان حد من صحابك عاملك وحش ولا ازمة ثقه مع حد . . يا سيدي ماهو الناس معاها حق . . هو حد يآمن لحد في الزمن ده . . و بعدين انت اللي غلطان برضه . . ماهو انت ما تعملش العمله وتقول للناس يستحملوك . . ماهو الناس دي مش شغالين عندك

منتهى الحديث بقى ان مفيش حاجه تضايق . . دي كلها مشاكل بسيطه . .

......................................................................................................................................

علاء

12 Comments:

  1. Anonymous said...
    هوا صحيح اسمو متضايقش نفسك

    بس هوا واضح انو قناع

    و كلام من حد متضايق فعلا

    بس عايزة اقولو

    بجد بجد ما تدخلش نفسك في مود النكد

    لان الكد مش هيعز عليه ينكد عليك

    سيبك

    :D
    Anonymous said...
    ايه يعني اللي يضايق؟
    كل ده ومفيش حاجة تضايق
    هى دي ممكن تكون مشاكل بسيطة بالنسبة لك بس معضلة بالنسبة لناس تانية كتير مع التفاوت في درجة الزعل
    كل اللي عايزة أقوله ان الزعل والضيق مش نهاية الكون
    ممكن حياتي تقف بسببهم شوية بس لأننا بشر فاحنا أكيد هننسى
    النسيان هو نعمة من الله
    اخر كلامي هو
    اضايق واغضب واصرخ عشان تعبر عن اللي جواك وبلاش حالة اللامبالاة الظاهرية فقط
    اللامبالة دي مجرد قشرة صامدة أمام كل الحاجات اللي ذكرتها بس ممكن ييجي عليها الوقت وتتكسر مع أبسط مشكلة

    بلاش القشرة دي على الأقل مع أقرب الناس ليك
    انت محتاجهم وهما محتاجينك
    WhiSpeR said...
    يا باشا
    أنا تعبت خلاص بصراحة
    طب انت مش حاسس إن أنا مثلا المفروض أتضايق
    ذاكرت مادة على مدى 6 أيام وطلعت عيني فيها
    وراجعتها و حفظتها وفهمتها
    وفي الآخر رحت لقيت امتحان معضلة
    وهشيل المادة وأمتحنها تاني السنة الجاية
    بلاش دي

    في وسط كل بهدلة الامتحانات اللي أنا فيها
    ييجوا صحابي اللي هما صحابي
    ومش مستحملين حاجة
    طب دة انتوا وضعكوا مش زي وضعي
    إيه اللي يخليكوا تتعصبوا عليا وتقولوا كلام مش ظريف
    بلاااااااااااش دي
    إيه رأيك في الحالة الصحية اللي أنا بقيت فيها ؟
    أظن انت شايف بعينك
    واوعى تقوللي ما هو بايدك
    لو بايدي أكيد ما كنتش عملت في نفسي كدة
    طب على الأقل انت كليتك ما بتحبهاش
    بس ماشي فيها كويس ما شاء الله
    انما كليتي أنا ما بحبهاش
    وماشية فيها بالعافية وبستر ربنا
    وعلى الصحاب
    أظن أنا رميت دستة صحاب السنة دي
    عااااااااااااادي اللي يخنق عليا أخنق عليه
    واللي عايز يسيبني مع ألف سلامة
    هو اللي خسران
    وطبعا عندك المشاكل التانية الكتيييييير اللي مفيش داعي أقولها
    وطبعا كذا مشكلة من اللي قلتهم أنا وانت فيهم في نفس الوقت

    ومع ذلك جيت امبارح بالليل
    قعدت قدام ماتش الأهلي والاسماعيلي
    وتناسيت كل المشاكل دي

    بس ما تبقاش تقوللي بعد كدة غاوية نكد
    شوف مين اللي غاوي

    :)
    break said...
    :((
    نكدت عليا الله يخليك
    علفكرة انا لسة خارجة من مود كابة فظيع
    ولما بتدى فرصة لنفسك انك تكتئب مش هتطلع منه ولا بعد مليون سنة
    كبر دماغك
    انت اعلى من كل حاجة

    عايزة اعدى هنا بكرة الاقيك كاتب شوية نكت :)

    تحياتى
    علاء عارفين said...
    منة الله*
    أولاً ك شكراً على مرور حضرتك بمدونتي المتواضعه
    ثانياً : فعلاً النكد بيجيب نكد
    معاكي حق

    .....................................
    *rania
    أنا بس ببقى خايف اكون حملت الناس اللي حواليا اكتر من طاقتهم. . فعشان كده لما بخس بكده بعمل نفسي مش متضايق . .بس اللي عارفيني كويس برضه بيفقسوني
    ...................................
    *whisper

    أختي العزيزه
    أولاً : كل ده رد !! . . انتي ما بتتعبيش من الكتابه
    ثانياً :انا ما قللتش من مشاكلك . .و ربنا معاكي طبعاً انا حاسس بالكرب اللي انتي فيه . . و على فكره مانا كمان اتفرجت على الماتش . . عادي

    اما عن موضوع غاوي نكد فبيتهيألي كل واحد فينا بيجيله فتره كده كلها نكد و بيقعد يقلب على نفسه . . يللا ما علينا

    ...................................
    *break

    هبقى أشوف موضوع النكت ده .. هحاول فعلاً ابقى انزل بوست خفيف كده بدل النكد ده بس لما ابقى مفرفش كده و في حاله كويسه
    loza said...
    مش عارفه ليه حاسه ان الدنيا مش مستهاله
    يعنى اليومين الى هنعيشهم هنقضيهم زعلانين وقافشين منها

    ربنا يفك كرب كل متضايق
    catroz said...
    تصدق فعلا
    انا مش فاهمه بنضايق نفسنا ليه يعنى
    سنه ضايعه منى فى قسم مبحبهوش
    نص اللى اعرفهم بيقولوا على مجنونه
    و اللى كان بينقذنى و اترمى فى حضنه
    بابا
    اتوفى الاسبوع اللى فات
    هتضايق ليه يعنى
    مفيش حاجه تضايق فى االعالم ده
    احنا اللى مزعلين نفسنا على الفاضى
    الحياه حلوه و كله تمام
    احنا اللى بنتلكك
    ........
    طيب تعالى نتكلم جد بقى
    سيبك من دا كله
    هى حاجات اااه تضايق
    بس عارف
    مهما كان ربنا مبتيلك بحاجه
    اتاكد فى ناس تانيه ربنا مبتليهم بحاجات ااكتر من كده
    قول الحمدلله
    الحمدلله على كل شىء
    فكر كده
    انت اهلك كويسين
    اااه تعبانين من الحياه اللى هما فيها
    بس على الاقل كويسين
    ليك بيت
    فى ناس غيرك معندهمش بيت
    الحنفيه بتنزل ميه
    احمد ربنا
    فى ناس بيموتوا من العطش
    قول الحمدلله بجد
    هتتخرج و مش هتلاقى شغل
    متقولش كده
    ما يمكن ربنا يكرمك و انت تشتغل و غيرك لا
    خلى ثقتك فى ربنا عاليه
    و خليك متاكد
    ان اللى انت فيه ده
    مليون واحد بيتمنوا يبقوا زيك كده
    ...:)
    انت ربنا بيحبك
    خلى ثقتك فى ربنا عاليه
    و خد بالك
    ربنا كريييييييييييييييييييييييييم اوى فوق ما تتصور
    و خليك متفائل شويه
    و حاول تبص لحياه من زاويه مختلفه غير اللى بتبص بيها دى
    و ربنا هيكرمك ان شاء الله
    و تبقى دكتور قد الدنيا كده
    ..:)
    المجاهدة said...
    :):)

    مش لاقية كلام اضيفه
    :)

    مممم
    بس بجد
    كلام حضرتك في البوست نفسه عشان تصبر نفسك بيه

    كلا واقعي و حقيقى
    فكر فيه تاني.. بس ابعد عن حتة انك بتقوله بسخرية
    فكر فيه انه بجد
    :)
    و دور تاني هتلاقي ان كل حاجة ماشية في الطريق الخير الي ربنا مقدرهولك
    :):)

    ربنا يباركلك و يرضى عنك
    :)
    FloNa said...
    عجبتني كلمة لوزة

    هيه الدنيا كام يوم حنعيشهم

    فليه نقضيهم زعلانين وقافشين

    مفيش حاجة مستاهلة والله زي ما حضرتك بتقول

    هوه صحيح بوست تريأة


    بس اصل بجد كلنا جوانا هموم كتير اوي ومشاكل مش بتتحل

    بس اصل خلاص حنعمل ايه

    زعلنا !!

    طيب حصل ايه

    ولا حد بصلنا حتى

    توكل على ربنا وسيبها عليه وكل حاجة حتبقى تمام :)


    على رأي الشباب يعني يا عم فكك
    !!
    Anonymous said...
    أنا عايز اقولك زي رانيا
    إحزن وإغضب وثور وإتضايق وحتى إبكي
    بس هزود حجاة واحدة
    يا ريت تكمل طريقك ومتقفش

    فيه كلمتين حلوين عايز اقولهملك وفكر فيهم كويس :

    يا تكون قد الحياة
    يا تعيش وحيد وسط الدموع

    اليأس ضعف وخوف جبان
    لكن الأمل يفتح بيبان

    حس بضياء القمر
    انقش قلوب عل الحجر
    على شيء متندمشي

    إمشي الطريق إمشيه
    العمر إيه يرويه
    غير قلب ميخفشي

    في ناس كتير ترضى المصي
    وناس تشوف بضمير ضرير

    لسة الحياة قدام
    قوم لون الأحلام
    وإوعى متضحكشي
    Anonymous said...
    معلش يا علاء بس فيه كلمة غلط في الآخر

    فيه ناس ترضى المصير

    يا ريت تصلحها وتشيل الكومينت ده

    sorry
    Superman said...
    للاسف مشكلتك الحقيقيه يا دكتور انك بتصنع المشاكل بعد كده تضايق نفسك عشانها طب ليه من الاول
    نفترض ان المشكله حصلت خلاص
    لازم تتحمل نتيجه خطائك و اظن ان ده اقل واجب
    عشان تقول لوحده انا بحبك لازم تكون مستعد استهداد كامل نفسي و ذهني و مادي و............... تخنار التوقيت المناسب لانك تقول ده
    اقل واجب انك تكون مستعد نفسيا لقوله لااااااااااااااا من الطرف الاخر

    بالنسبه لحوار الاصدقاء اللي يبيعك بيعه و نفضله وششششششششش
    بس متبقاش انت الغلطان و ترجع تقول انا مضايق
    زي ما قولت في الاول لازم تستحمل عواقب غلطتك
    و انا دايما بحب اقول كلمه
    ان اي حد بيغلط غلطه صغيره او كبيره لازم يدفع الثمن غالي او رخيص بس لازم ....يدفع التمن

Post a Comment