Tuesday, July 10, 2007


اولاً يا جماعه انا اسف على العنوان . . بس ملقيتش عنوان انسب منه

ثانياً ً خروجاً من جو الاحاسيس و المشاعر و المضايقه و النكد . . قررت احكي موقف حصل معايا الشتا اللي فات

حبه فرفشه يعني . .

تعالوا نجيب الموضوع من الاول . . كان اول يوم العيد شارف على الانتهاء . . كنا ساعتها في مدينة نصر

الساعه تقريباً داخله على 12 و المفروض ان احنا تاني يوم نروح لاحد اصدقائنا في كوم حماده لقضاء يومين في الريف عندهم في العزبه

بس المشكله بقى فيييين؟؟

ان انا ساكن في حلوان و كن مجبتش هدومي و كده يعني . . .و كان المفروض ان احنا نبات عند واحد مننا و الذي هو ساكن في الهرم . . . . (قشششششششطه)

المهم خدنا ميكروباص من مدينه نصر لحلوان

و روحنا البيت انا وواحد جه معايا من باب التسليه

المهم ظبطن الشنطه و خدناها و نزلنا و ركبنا ميكروباص من حلوان للجيزه

ووصلنا الجيزه حوالي الساعه 2:30 . . . . . (تمااااام)

و المفروض بقى ان احنا نركب عربيه فولكس للهرم

وجت العربيه بسرعه . . و بغض النظر عن ان السواق كان شكله مريب ركبنا العربيه . . (ماهو اصلاً نص السواقين في مصر شكلهم مريب)

و بعدين فوجئنا ببتاع 6 شباب جايين راكبين معانا اتنين قدام جنب السواق وواحد جمبنا واتنين ورا. . و اول ما ركبوا العربيه طلبوا من السواق انه يفقل الباب

رغم ان العربيات دي في العاده بتمشي ببابها مفتوح . . و قالوله عشان البرد و كده

وانطلق السواق بسرعه اسطوريه . .

و فوجئنا بالشخص الكائن جمبنا بيقول للورا . . نشربها دلوقتي . . قام اللي ورا قال له ماشي . . راح فاتح حاجه كانت ملفوفه قام اللي ورا قال له . .

السجاير يللا مش البيره

وقاموا بتوليع عدد من السجاير وعزموا على السواق الذي لم يمانع اطلاقاً وكانهم بيعزموا عليه بعصير قصب مثلاً . . .

وم اقولكوش على السواقه بقى . . تحفففففه

المهم احنا وصلنا الى المكان المنشود و نزلنا من الميكروباص بسرعه شديده

المهم الموقف كان مضحك جداً . . للدرجه دي البانجو بقى عادي جداً . . . و عجبي

10 Comments:

  1. Anonymous said...
    أولا نا أول مرة أعرف الحكاية دي دلوقتي بس مش عارفة أبطل ضحك من الموقف طبعا والضحك علينا كشعب
    هو خلاص البانجو ولا البيرة بقوا حاجة عادية
    بس قول الحقيقة مخدتش نفس ولا حاجة؟؟

    ثانيا حمدالله على السلامة لرجوعك لبلوجك المصون والله كان مظلم من غيرك
    -مش ممظلم أوي يعني-
    break said...
    يااااااه تعالى عندنا بس كدا
    اودامنا شارع ساكت كدا بشوفه من بلوكنة بيتنا
    كل المحششين بتوع البلد بيجو هنا
    زمان لما كنت اقف فى البلكونة كانو يخافو ويطلعو يجرو
    واللى يبصلى ويخوفنى ويعملى على دقنه كدا نظام هوريكى عشان شفتينى
    دلوقتى لما بطلع بيضحكو ويبصو كانى شفتهم بيصلو !

    وعجبى

    تحياتى
    loza said...
    دلوقتى انك تتمسك بحشيش اكرم لك من انك تتمسك بكتاب سياسى:D
    علاء عارفين said...
    rania
    لا يا ستي مخدتش نفس بس الجو كان مليان دخان ريحته جامده انا لو كنت طولت شويه كنت اتسطلت
    ......................................
    break
    ماحنا تحت الشباك برضه بييجحي شوية شباب ويشربوا بانجوا
    ويقعدوا يغنوا احياناًكمان.......................................
    loza
    فكرتيني بنكته و اللهوبعدين انت شكلك بتتكلمي في السياسه كتير وهتودينا في داهيه
    :D
    ياسر سليم said...
    كل حاجة بقت كده عادى وبتاع

    وهى الدولة عايزه كده

    عايزه شعب مخدر

    شعب محشش

    عشان الناس ما تبقاش فايقة للدوله هى بتعمل ايه

    حسبنا الله ونعم الوكيل
    WhiSpeR said...
    ماحنا تحت الشباك برضه بييجحي شوية شباب ويشربوا بانجوا
    ويقعدوا يغنوا احياناًكمان


    آآآآآآآه
    الشابين الظراف اللذاذ دول
    المشكلة انهم مقتنعين بموهبتهم
    وبيقعدوا يشربوا ويتحفونا بأصواتهم المسطولة على الصبح


    الموقف دة أنا سمعته خمس ست مرات منك
    وكل مرة اسمعه برضه بدحك
    :D
    Anonymous said...
    يا بن الإيه ، فكرتني برضه بكذا موقف حصلوا معايا أو عشان محدش يفهم غلط واحد قدامي والتاني إتحكالي ،

    أولا : هو على ما يبدو إنه عادي أوي شرب البانجو أثناء السواقة ، بس يا جميل اللي حصل معاك حصل معايا ، بس كنت لوحدي وكنت في ميكروباص بيعدي على البلد في طريقي للقاهرة ، المهم الفرق الأهم إنه عمل حادثة جميلة خالص والحمد لله أنا طلعت سليم متسألش إزاي ، وللعلم اللي جمبي إتكل على الله ، وللعلم كمان هم تقريبا 3 بس اللي طلعوا احياء من الميكروباص المقلوب وده حصل الصيف اللي فات

    الثاني بقى يا جميل : إن واحد إتمسك بإزازة بيرة يا معلم وكام سيجارة بانجو من اللي قلبك يحبهم ، قال إيه الظابط الخرمان كان عايز ياخد الحاجة كلها ويضرب عليها ، يا بن الإيه ، قال ظابط قال ، المهم غنه توصل لحل وسط مع صاحب الحاجة إن الظابط ياخد سجاير البانجو بس عشان ميصحش إنه يسكر ، إفرض كبس عليهم رتبة كبيرة ، وكمان خباثة من صاحب الحاجة ، عشان تمن الإزازة شيء وشويات
    و......................و
    عمار يا مصر
    بس بجد هو مين اللي كان معاك وأنا أعرف إزا خدت نفس وللا لأ
    المجاهدة said...
    :d
    حضرتك لازم تتعود

    عندنا من ده كتيييييييييير

    تحت بيتنا كل يوم بالليل يجي شوية شباب زى الورد يفضلوا لحد الفجر

    و عندنا في الكلية
    و تشوفهم في الشارع

    يااااه

    على رأي لوزة فعلاً
    تتمسك بحشيش اكرملك من انك تتمسك بأي حاجة تانية:d
    FloNa said...
    انا في المنصورة اللي كنت اشوفهم كتير اوي ما شاء الله


    لا الطريف في الموضوع اني مرة كنت انا وقرايبي البنات ومعانا قرايبنا الشباب الساعة خمسة الفجر مستنيين عربية تيجي تاخدنا على المحطة !!!

    كان فيه بنت بتظهرلنا من الشباك مرعوبة مننا فاكرانا محششين وكدة

    كل شوية تطلع وتدخل وتفتح النور وتقفل النور

    واحنا بندحك وبنعيش الدور

    عادي عادي :)
    علاء عارفين said...
    شكراً يا جماعه على ردودكم


    هو صحيح اغلب اللي بنقوله بيضحك بس فعلاً. . . .شر البليه ما يضحك

Post a Comment