Thursday, September 06, 2007

اي نور لو جنب نورك . . يبقى ضلمه ماهوش ده نور

ياللي لما بتيجي . .يدخل عالحضور فرح و حبور

واما تمشي القلب . . يحزن ولا ابقى عارف ايه السرور

..........................................................

نفسي اوصف بس وصفي . . فيكي ماتكفيه سطور

حتى لو عندي لوصفك . . مما قال الناس بحور

........................................................

و انتي ماشيه لمحت نورك . . قلت عالارض البدور ؟

واما حد يقول دي جايه . . كنت اقوم الف ادور

انتي فين يا نن عيني . . انتي فين يا أحلى حور

..........................................................

يالللي عاليه ياللي غاليه . . انتي ليه حكمك يجور

عاللي لو هتشوفي قلبه . . هتلاقيه بانيلك قصور

قصر فرح و قصر حب . . قصوري من غيرك قبور

حني ياللي القلب لما . . بعدتي عنه بناله سور

عازله عن ناسه و اهله. . عاش بعيد عن كل نور


...................................................................................................................................................................

عـــــــــــــــــــــــــلاء



7 Comments:

  1. Anonymous said...
    واما حد يقول دي جايه . . كنت اقوم الف ادور انتي فين يا نن عيني . . انتي فين يا أحلى حور


    بجد كلام طالع من القلب وكيد واصل للقلب
    اسمحلي احسدك على الكلام الحلو ده واحسد اللي بيتقاله الكلام
    بجد يا بخته
    أنا اخترت الجملتين دول بالذات عشان دول اللي محلينها
    دي وجهة نظري المتواضعة
    sa'7so'7te said...
    حني ياللي القلب لما . . بعدتي عنه بناله سور

    عازله عن ناسه و اهله. . عاش بعيد عن كل نور

    begad to7fa elkalam bezzat kaman "2sore mn '3er 2bor"
    FloNa said...
    جميلة اوي بجد طالعة من القلب فعلا

    !!
    ممممممممممم
    مش واخدين على كدة احنا

    :D
    Anonymous said...
    جامد يا بني
    إستمر
    بس وظف الكلام ده بقى صح يعني لو الكلام ده لشخص يستاهله بجد
    لشخص حاسه بجد
    لبني آدم فاهمه صح
    يبقى إنت عديت
    وبقي واد شديد أوي

    أي كلام بيفضل مجرد كلام
    ما دام ملوش تأثير في الواقع

    سنة صراحة ضرورية عشان لازم أعك الدنيا في الآخر
    بس بجد كلامك جميل ومشاعر دافئة بجد
    من كل قلبي بقولك ربنا يوفقك
    ahmed mefrh said...
    يبدو يا عم علاء الرومانسيه واخده حقها منك جامد .....احذر اصل الرومانسيه غداره و ليس لها امان
    الحمد لله said...
    انا بجد محتار.. انا حاسس ان كلامك ده زى ما يكون خليط من قصيدة رائة لنزار قبانى واغنية تافهة لتامر حسنى.. متزعلش مش قصدى اهانة ولا تريقة,, والله انت شعرك حلو بس مش عارف ليه ده الاحساس اللى وصلى فى الاول

    حاول تقرا شعر وادب اكتر وتبطل تسمع تامر حسنى اذا كنت بتسمعه.. وعلى فكرة كل لما تقرا اكتر كل اما ثروتك وملتك تزيد
    break said...
    البوست كله بيطلع نور


    بقالى كتير اوى مقرتش حاجة رومانسية

    :)

Post a Comment