Monday, July 23, 2007



موقف تاني . . حصل معايا من كام يوم و انا في المترو . . و كان ساعتها المترو فاضي الى حد ما

و في محطه من المحطات ( مش فاكر هي ايه) . . دخل واحد من الاطفال المشردين دول ( لو بتركب مترو اكيد هيكون صادفك واحد منهم قبل كده)

المهم . . الواد ده قعد يجري في المترو و يتشعلق هنا و هناك . . وكان في راجل قاعد كده شكله اساساً طالع عينه و مش طايق نفسه

قام الراجل ده زعق للولد اللي بيتنطط (عادي) . . وقام الراجل اللي قاعد قدامه هو كمان قال يزعق للولد (اشمعنى هو يعني !!)

فالراجل الاولاني قام قايل للولد : انا هوديك لامين الشرطه يضربك . . فأثنى عليه الراجل اللي قاعد قدامه و قال : اللي زي دول لازم يروحو الاحداث

المهم فعلاً قام الراجل شادد الواد و عايز يروح يديه لامين الشرطه اللي في المحطه الجايه

أنا كنت قاعد اتفرج و مبتكلمش . .

بس بعد دقيقه كده قررت اروح اتكلم مع الراجل ده . .

فسألته ( و بمنتهى البراءه ) : هو الولد ده عمل ايه ؟

فجاوب و قال : عمال يتنطط و العربيه فيها حريم و اطفال

فقلتله : يعني الولد مسرقش ولا خبط حد و لا حتى شتم حد . . من الحريم و الاطفال اللي موجودين في العربيه

فقالي نفس مقوله الراجل اللي كان قاعد قدامه : اللي زي ده لازم يروح الاحداث

فجاوبته : وبعد كده نرجع نشتكي ان هيطلع من الاحداث مجرم بجد !!

فقاللي مقوله رائعه : و هو كده مش مجرم ............... (يا سلااااام !! . . هو يعني عشان خاطر بيتنطط زي اي عيل بقى مجرم )

فجاوبته : لا مش مجرم . . ده طفل و بيتنطط . . عادي جداً ولا هو عشان ملوش حد يحامي عنه
المهم و بعد هذا الحوار قرر الراجل انه يسيبه ينزل من المترو

و بعدها جرى حواار لطيف اشترك فيه ذلك الرجل اللطيف ( بتاع . . لازم يروحو الاحداث)

المهم لقيتلك الراجل ده بيقول كلام " لذيذ . .

بيقول ايه بقى . .بيقول انه بيشتغل في مؤسسه مختصه بأطفال الشوارع و المشردين وخلافه

و بيقول انه الاطفال دي لازم تتحرق في أفران غاز . . ( لا يا شيييخ !! )

قلتله : لما حضرتك المفروض انك من الجهه المختصه برعايتهم عايز تولع فيهم . . امال بقية الناس تعمل ايه

قاللي : دول انتاجيتهم صفر . . عاله على المجتمع . .

فرديت : فبدل ما نحاول نخليهم منتجين . . نقوم نولع فيهم

قاللي : دول فئات ملهاش لزمه . . اطفال شوارع . . مرضى الايدز . . . و قال حاجات تانيه بس انا مش فاكرها

بس حكايه مرضى الايدز دي اللي غاظتني جداً . .

فقلتله : يعني ذنبه ان هو مريض نقوم نحرقه . . و بعدين لعلمك اغلب مرضى الايدز في بلدك بيبقى عن طريق نقل دم ملوث

يعني مش ذنبه . . يعني مفيش اي احترام لانسانيته خالص . . ده الرسول صلى الله عليه و سلم امرنا بالرحمه حتى للحيوان و النبات . . ما بالك بقى . . ده بني ادم

قام رادد : قاللي . . لا طبعاً الرحمه موجوده . .ده حتى كان جايلنا دكتور مصري من قطر و كان حصلله نقل دم ملوث و تعاملنا معاه بمنتهى الاحترام . .

قلتله : يعني عشان خاطر هو دكتور نعامله كويس و عشان دول مالهمش حد نحرقهم . . .

المهم ساعتها المترو كان وصل حلوان و سلمت عليهم و مشيت . .
انا مش عارف بصراحه الناس دي . . ده يعني العادي ولا هو انا اللي فاهم غلط ولا ايه بالظبط . . .

6 Comments:

  1. samho0on said...
    هو طبعا أنا أكيد متفق معاك في كل اللي قلته
    مجتمعنا ده فيه ناس كتير مسؤولة عن الإصلاح
    - بصرف النظر عن اللي مفروض يتم إصلاحه-
    بيبقوا هم نفسهم عايزين تأهيل نفسي
    فعلا إزاي واحد مفروض إنه يقعد مع طفل متشرد ويشوف مشاكله ، بينما المسؤول ده في دماغه الغدر بالطفل ده ، في ذهنه إن طفل زي ده لا يستحق حتى الحياة، وده أبسط حقوق الإنسان على أخيه الإنسان

    لو كل فرد تولى تخصصه ، مكنش بقت مشاكلنا مستفحلة للدرجة دي

    لو المسؤولين عن ظاهرة أطفال الشوارع ، كانوا مؤهلين فعلا للتعامل بإيجابية مع هذه الفئة من الأطفال مكنتش وصلت للدرجة دي

    المفروض إن اللي عايز الوطن ده يرتقي يبقى مقتنع بحقيقة إن كل إنسان لديه موهبة
    ممكن تكون خلاقة مبتكرة بس بما فيه فايدة للمجتمع وساعتها ، جهدي وجهدك يبقى عندنا جيل ثم جيل ثم أجيال أقل وصف ليهم إنهم عباقرة

    أما لو كانت الموهبة دي في شيء سلبي ، ممكن يتم تغيير مسارها لهدف إيجابي ، أو ممكن عن طريق مختصين بنفسية الأطفال إنهم يحولوا عقلية الطفل لشيء أكثر إيجابية


    يا جماعة غلط كبير إننا نيأس من إصلاح أي طفل
    لسبب واحد ،
    وهو إن الطفل ده عقليته ما زالت تنمو ، فلو كان إتجاها إيجابي ممكن نديها دفعة للأمام
    ولو كان إتجاهها سلبي ممكن -بسهولة أو بصعوبة مش هي دي المشكلة -
    إننا نغير إتجاهها للنقيض تماما
    LOJAIN said...
    على فكرة كويس قوى انه اصلا حتى اتناقش معاك
    ده وان دل على شىء فانه شخصية مقارنة باللى موجودين دلوقت شوية بتفهم و لسة بتستخدم لسانها
    ياااااااااه
    ده معدش موجود اصلا

    هو فعلا الاطفال اللى بالمنظر ده حاجة تغيظ ومش مترو كفاية اسلوب التسول بتاعهم حتى
    بس مفيش ريحة المسؤلية تجاه الاطفال دى اللى ادت لظهورها اساسا
    واللى بيعمل حاجة جمعيات على قدها عايشة عل التبرعات
    وشوية وبتقفل
    ونرجع نقول ليه فى توربينى و سفاح المعادى

    نصيحة منى متتناقش مع حد تانى
    عملتها قبل كده و كنت هنضرب
    فنقدر نقول على راى محمد هنيدى
    عندنا ضحية واحدة.. عندنا ضحية واحدة

    طبعااللى هى انا

    Regards:
    Lojain :)
    Rania said...
    أولا أنا زعلانة أوي وانت عرف ليه
    بس يللا مش مشكلة بقى والله يسامح اللي في بالي

    ثانيا أنا متشكرة جدا انك اتكلمت مع واحد زي ده وعرفت بيفكر ازاي
    التفكير الرجعي والسطحي اللي مش بيفكر ولا في الرحمة والانسانية
    مجرد تفكير تدميري همجي
    وبجد احييك واشكرك مرة تانية
    break said...
    احييك على ايجابيتك
    وربنا يكون فعونهم
    مش عارفة مفيش تعليق عندى على الموضوع دا اكتر من كدا
    لان مفيش تعبير احسن من ربنا يكون فى عونهم
    بس ما شاء الله شايفة الردود فوقى صفح قلت ارغى شوية
    :)
    تحياتى
    DR_NIGHTWING said...
    samhoon

    شكراً يا معلم على مرورك الكريم

    .....................................
    lojain

    يا ستي كويس ان هو استعمل لسانه عشان نعرف البلاوي اللي في دماغه

    ......................................
    rania
    ربنا ما يجيب زعل و ان شاء الله المره اللي جايه مش هتزعلي

    ..................................
    break

    يا ستي و الله مش لازم ترغي . . كفايه اوي ان حضرتك مريتي من هنا
    Anonymous said...
    福~
    「朵
    語‧,最一件事,就。好,你西...............................................................................................................................-...相互
    來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

Post a Comment