Wednesday, August 15, 2007



معالق الشاي اللي عندنا في البيت مش قد بعض . . يعني حاجات كبيره و حاجات صغيره

لأنهم مش طقم واحد دول كذا طقم ده غير مره ممكن تشتري شاي تلاقيه فيه معلقه وكده . . . فبقى الواحد عنده تشكيله من الاحجام و الاشكال . . .

المهم موضوع المعالق عامللي مشكله . . كل ما اجي اعمل شاي

ممكن يطلع تقيل بزياده . . او خفيف بزياده . . حسب المعلقه يعني . .

فبقى الواحد مضطر ياخد باله من حجم المعلقه عشان يطلع الشاي مظبوط



المهم بقى خدتوا بقى انتوا بالكو

يعني المعالق دي متغير . . لازم الواحد يراعيه . . ولازم الشاي يطلع مظبوط وده المفروض ثابت

و على كده حاجات كتير في الواقع . .

يعني كل مجتمع له متغيراته وانت لازم تراعيها عشان شايك يطلع مظبوط . . يعني من غير ما تبوظ اخلاقك ولا دينك ولا اي (ثوابت)

وعلى كده برضه الناس . . يعني في امور كل واحد بيبقى له نظره فيها . . وانت عشان متعملش مشاكل لازم تاخد بالك من حجم المعلقه (قصدي معايير الشخص اللي بتتعامل معاه يعني

وعشان محدش يفهمني غلط بقول تاني . . لازم الشاي في الاخر يطلع مظبوط – دون المساس بالثوابت – لأن لما الشاي يطلع مظبوط انت تعرف تعيش حياتك على الوجه الامثل

و اتمنى ان يكون شايكم مضبوط على طوول



......................................................................................................................................................................


8 Comments:

  1. Anonymous said...
    الفكرة جامدة أوي
    أنا في الأول استغربت وبصراحة مكنتش فاهمة
    بس انت وصلت الموضوع بابسط طريقة وباحلى اسلوب
    أكيد مش هأعرف أقول كلام أحلى من اللي انت كاتبه
    بس وصلك من كلامي انه عاجبني
    Unknown said...
    شوف أنا شايي مزبوط طول عمري :D
    هو أينعم سكر زيادة

    بس معنديش غير معلقة واحدة
    one size
    :D
    Anonymous said...
    بصراحة كدة
    الكلام نفسه مظبوط على الآخر
    أنا مش لاقي كلمة واحدة مفيدة ممكن أقولها بجد بعد ما قريت كلامك
    يعني هو من الآخر
    كلام جميل مقدرش أقول حاجة عنه

    هي الفكرة اللي بتتطكلم عنها وصلت الحمد لله على طول

    بس نفسي أعرف ربط الفكرة بمعلقة الشاي
    إنت إستوحيتها من خيالك ولا منين
    إوعي يكون من القفشة بتاعة الموظف وفنجان القهوة اللي قلتلك عليها

    على العموم إنت بجد رائع جدا و
    مش عارف بجد أقول كلمة بعد اللي إتكتب
    An Author said...
    فكرة حلوة و مبتكرة
    سبحان الله كلنا عندنا معالق مختلفة ،بس محدش جه فى دماغه خالص التصور و التشبيه بتاعك ده
    LOJAIN said...
    تشبيه غاية فى الروعة بجد
    انا هبقى استعيره احيانا ... هااااا
    بس مش هقول منقول يعنى

    كنت فى كارفور و الله وشفت العرض بتاع ربع كيلو شاى خرز و معاه معلقة و قعدت اضحك زى الهبلة و افتكرت البلوج

    بس للاسف احيان كتير فى الزمن ده مش بس بتتمس القوابت
    دى بتتكسر
    و كل موقف بقت تتغير عنده المبادىء
    لحد ما وصلنا لمرحلة انه من المبدا
    الا يكون لك مبدا

    ميرسى على تمريرة التاج
    ده تاج على رؤسنا بجد يا دكتور
    ;)
    هعمله اهو ان شاء الله بس اصلى كنت مشغولة شوية امتحانات و شغل و قلق

    ونفسيه عالية جدااااااا .. بس ده بقى طبيعى يعنى

    Regards:
    Lojain :)
    علاء عارفين said...
    rania

    شكراً على كلماتك الرقيقه و انا مبسوط انها عجبتك

    ..................................
    amr

    يا عن يا رب شايك يفضل مظبوط على طوول

    .................................
    samhoooon

    شكراً على المجامله دي يا باشا

    اما بقى الفكره بقى دي نطت في دماغي وانا بعمل شاي بحليب الساعه 2 بالليل
    علاء عارفين said...
    جيداء
    شكراً لتشريفك لمدونتي المتواضعه
    و يا ريت تشرفيني بحضورك على طول


    ....................................

    lojain

    يا سيدتي ما هو ده اللي انا بتكلم عليه . . ان الشطاره انك تراعي المتغيرات و في نفس الوقت يطلع الشاي مظبوط مهما المعالق اتغيرت
    المجاهدة said...
    ماشاء الله
    :)
    جميل جدا ان حضرتط طلعت من الموقف الصغير ده بمعني كبير قوى عن الدنيا بالشكل ده :)
    ربنا يبارك فيك
    :)

Post a Comment