هنـــــــــــا .... و هنـــــــــــــــــــاك

"اذا أردت شيئا بشدة فأطلق سراحه فإن عاد اليك فهو ملكك الى الأبد وان لم يعد فهو لم يكن لك من البداية"

مقوله . . لا أدري- حسب معرفتي الضئيله- اين مصدرها أو من قائلها ولكني اسمعها كثيراً

ترى هل هذا حقيقي . .

دعني افسرها كيف اراها

انت تريد الشيء بدرجة كبيره . . و بما ان العباره تقول (اطلق سراحه ) فان دل ذلك على شيء فانه يدل على انك امسكت الشيء الذي تريد . . فأنت لا تطلق سراح ما ليس بين يديك

و لكن اذا عاد لك . . لماذا قد يعود لك ما قد تخليت عنه . .

انا ارى هذه المقوله من وجهة نظر أخرى

أذا اردت شيئاً فأطلقت سراحه

فانه قد يعود لك . . فإن عاد فانه قدر لك او لحسن حظك

و إن لم يعد فإنك ستبكي هذا الشيء الذي اردته دوماً و ستنعى حظك المرير . . و لربما تلوم نفسك أن قد تخليت عنه

ربما المقوله منذ البدايه صحيحه و لربما ان بعض الاشياء اذا حظيت بها فلا يجدر بك التفريط فيها لأانها قد لا تعود ابداً

ووقتها لن تكون تلك الاشياء (ليست ملكك منذ البدايه ) وانما انت بتركها جعلتها ليست بملك لك

هذا رأيي المتواضع ليس إلا . . .

..........................................................................................................................................................................

معالق الشاي اللي عندنا في البيت مش قد بعض . . يعني حاجات كبيره و حاجات صغيره

لأنهم مش طقم واحد دول كذا طقم ده غير مره ممكن تشتري شاي تلاقيه فيه معلقه وكده . . . فبقى الواحد عنده تشكيله من الاحجام و الاشكال . . .

المهم موضوع المعالق عامللي مشكله . . كل ما اجي اعمل شاي

ممكن يطلع تقيل بزياده . . او خفيف بزياده . . حسب المعلقه يعني . .

فبقى الواحد مضطر ياخد باله من حجم المعلقه عشان يطلع الشاي مظبوط

المهم بقى خدتوا بقى انتوا بالكو

يعني المعالق دي متغير . . لازم الواحد يراعيه . . ولازم الشاي يطلع مظبوط وده المفروض ثابت

و على كده حاجات كتير في الواقع . .

يعني كل مجتمع له متغيراته وانت لازم تراعيها عشان شايك يطلع مظبوط . . يعني من غير ما تبوظ اخلاقك ولا دينك ولا اي (ثوابت)

وعلى كده برضه الناس . . يعني في امور كل واحد بيبقى له نظره فيها . . وانت عشان متعملش مشاكل لازم تاخد بالك من حجم المعلقه (قصدي معايير الشخص اللي بتتعامل معاه يعني

وعشان محدش يفهمني غلط بقول تاني . . لازم الشاي في الاخر يطلع مظبوط – دون المساس بالثوابت – لأن لما الشاي يطلع مظبوط انت تعرف تعيش حياتك على الوجه الامثل

و اتمنى ان يكون شايكم مضبوط على طوول

......................................................................................................................................................................

انت مين ؟؟
سؤال صعب على فكره . .
مؤقتاً . . أنا علاء . .

مين اكتر ست اشخاص بتحبهم ؟؟

ماما و بابا و اخواتي و اصحابي
مينفعش سته بس على فكره
كده في ناس هتزعل


انت سعيد؟

مش عارف و الله . . لما اعرف هقولك
بس أنا ببقى مستريح طول مانا مبفكرش لا في امبارح ولا في بكره

لو اجتمعت انا وحسني مبارك في غرفة واحدة؟

بابا حسني . . هشرب الشاي و اسلم على طنط سوزان
واقولهم يلسمولي على جمال وعلاء
واتكل على الله
:D

لو معاك مليون ونص جنيه......تعمل بيهم ايه؟

هتجوز

:D

بهزر طبعاً . . هشتري بيهم ارض او شقه في مكان ما على سبيل الاستثمار
و ابيعها بعد فتره سنه او سنتين
يطلع فيها قرشين حلوين . . اصل الجنيه في النازل
و مينفعش الواحد يشيل فلوس
لازم يشتري بيها حاجه

بتحب مصر؟

رغم الكرب . .
اساسي بحب مصر

بتحب البنات؟

رغم ان البنات مبيجيش من وراهم غير المشاكل
انما
.

.

.

هو في حد مبيحبش البنات

:D

انت مسلم ؟

الحمد لله

ليه؟

هو الواحد أساساً بيكون مسلم من قبل ما يتولد . . الحمد لله طلعت اهلي مسلمين
على نفس دين الفطره
الحمد لله

مين اكتر شخصية ما تقدرش تستغنى عنها في حياتك؟ وليه؟

في شخصيات كتير ما اتخيلش نفسي من غيرهم
ماما و بابا و اخواتي ويمكن كمان بعض من اصحابي

بس في الواقع ان الواحد على مر الايام هيفقد الناس اللي حواليه
مش معناه ان الواحد يموت و ميكملش حياته
عموماً . . ربنا يخلي كل الناس اللي حواليا
واتكل انا قبليهم كلهم

أما عن الــ ( ليه ؟ ) دي . . معرفش صراحه و بيتهيألي ملهاش مكان في السؤال

ايه اكتر موقف محرج اتعرضت ليه في حياتك؟واتصرفت ازاي؟
موقف محرج . . الحمد لله مش كتير في حياتي

و كلها من نوع اني طلعت على السبوره و معرفتش اجاوب

و حتى دي مش كتير – لأني عبقري طبعاً -
:D

:D

و اتصرفت ازاي متصرفتش . . هعمل ايه يعني هفتي

ايه الأمنية اللي بتدعي ربنا دايما انه يحققها لك؟

و الله دي حاجه بيني و بين ربنا
ايه الناس الحشريه دي

تمرر التاج دة لمين؟

امرره

لــــ

Lojain

................................................................................................................................................................

اليوم ذكرى ميلادي . . اليوم ادركت ان 21 شتاءً قد انقضت من عمري

هل ابتهج فرحاً بهذا . .قد يكون هذا الشعور السائد عند البعض

و لكن هذه المناسبة السعيده تذكرتي بأنني قد اصبحت وفقاً للقوانين كامل الاهليه

و ياللروعه لقد اصبحت كامل الاهليه ومازلت ( باخد مصروف )

و الرائع في الامر ان هذا الحال سيستمر لسنوات قادمه

قد يكون خطأي . . قد يكون قدري . . لا احد يعلم . . ولعل السنون القادمه تأتي بما لا اتوقعه

وكل سنه و انا طيب . . .

موقف تاني . . حصل معايا من كام يوم و انا في المترو . . و كان ساعتها المترو فاضي الى حد ما

و في محطه من المحطات ( مش فاكر هي ايه) . . دخل واحد من الاطفال المشردين دول ( لو بتركب مترو اكيد هيكون صادفك واحد منهم قبل كده)

المهم . . الواد ده قعد يجري في المترو و يتشعلق هنا و هناك . . وكان في راجل قاعد كده شكله اساساً طالع عينه و مش طايق نفسه

قام الراجل ده زعق للولد اللي بيتنطط (عادي) . . وقام الراجل اللي قاعد قدامه هو كمان قال يزعق للولد (اشمعنى هو يعني !!)

فالراجل الاولاني قام قايل للولد : انا هوديك لامين الشرطه يضربك . . فأثنى عليه الراجل اللي قاعد قدامه و قال : اللي زي دول لازم يروحو الاحداث

المهم فعلاً قام الراجل شادد الواد و عايز يروح يديه لامين الشرطه اللي في المحطه الجايه

أنا كنت قاعد اتفرج و مبتكلمش . .

بس بعد دقيقه كده قررت اروح اتكلم مع الراجل ده . .

فسألته ( و بمنتهى البراءه ) : هو الولد ده عمل ايه ؟

فجاوب و قال : عمال يتنطط و العربيه فيها حريم و اطفال

فقلتله : يعني الولد مسرقش ولا خبط حد و لا حتى شتم حد . . من الحريم و الاطفال اللي موجودين في العربيه

فقالي نفس مقوله الراجل اللي كان قاعد قدامه : اللي زي ده لازم يروح الاحداث

فجاوبته : وبعد كده نرجع نشتكي ان هيطلع من الاحداث مجرم بجد !!

فقاللي مقوله رائعه : و هو كده مش مجرم ............... (يا سلااااام !! . . هو يعني عشان خاطر بيتنطط زي اي عيل بقى مجرم )

فجاوبته : لا مش مجرم . . ده طفل و بيتنطط . . عادي جداً ولا هو عشان ملوش حد يحامي عنه
المهم و بعد هذا الحوار قرر الراجل انه يسيبه ينزل من المترو

و بعدها جرى حواار لطيف اشترك فيه ذلك الرجل اللطيف ( بتاع . . لازم يروحو الاحداث)

المهم لقيتلك الراجل ده بيقول كلام " لذيذ . .

بيقول ايه بقى . .بيقول انه بيشتغل في مؤسسه مختصه بأطفال الشوارع و المشردين وخلافه

و بيقول انه الاطفال دي لازم تتحرق في أفران غاز . . ( لا يا شيييخ !! )

قلتله : لما حضرتك المفروض انك من الجهه المختصه برعايتهم عايز تولع فيهم . . امال بقية الناس تعمل ايه

قاللي : دول انتاجيتهم صفر . . عاله على المجتمع . .

فرديت : فبدل ما نحاول نخليهم منتجين . . نقوم نولع فيهم

قاللي : دول فئات ملهاش لزمه . . اطفال شوارع . . مرضى الايدز . . . و قال حاجات تانيه بس انا مش فاكرها

بس حكايه مرضى الايدز دي اللي غاظتني جداً . .

فقلتله : يعني ذنبه ان هو مريض نقوم نحرقه . . و بعدين لعلمك اغلب مرضى الايدز في بلدك بيبقى عن طريق نقل دم ملوث

يعني مش ذنبه . . يعني مفيش اي احترام لانسانيته خالص . . ده الرسول صلى الله عليه و سلم امرنا بالرحمه حتى للحيوان و النبات . . ما بالك بقى . . ده بني ادم

قام رادد : قاللي . . لا طبعاً الرحمه موجوده . .ده حتى كان جايلنا دكتور مصري من قطر و كان حصلله نقل دم ملوث و تعاملنا معاه بمنتهى الاحترام . .

قلتله : يعني عشان خاطر هو دكتور نعامله كويس و عشان دول مالهمش حد نحرقهم . . .

المهم ساعتها المترو كان وصل حلوان و سلمت عليهم و مشيت . .
انا مش عارف بصراحه الناس دي . . ده يعني العادي ولا هو انا اللي فاهم غلط ولا ايه بالظبط . . .

اولاً يا جماعه انا اسف على العنوان . . بس ملقيتش عنوان انسب منه

ثانياً ً خروجاً من جو الاحاسيس و المشاعر و المضايقه و النكد . . قررت احكي موقف حصل معايا الشتا اللي فات

حبه فرفشه يعني . .

تعالوا نجيب الموضوع من الاول . . كان اول يوم العيد شارف على الانتهاء . . كنا ساعتها في مدينة نصر

الساعه تقريباً داخله على 12 و المفروض ان احنا تاني يوم نروح لاحد اصدقائنا في كوم حماده لقضاء يومين في الريف عندهم في العزبه

بس المشكله بقى فيييين؟؟

ان انا ساكن في حلوان و كن مجبتش هدومي و كده يعني . . .و كان المفروض ان احنا نبات عند واحد مننا و الذي هو ساكن في الهرم . . . . (قشششششششطه)

المهم خدنا ميكروباص من مدينه نصر لحلوان

و روحنا البيت انا وواحد جه معايا من باب التسليه

المهم ظبطن الشنطه و خدناها و نزلنا و ركبنا ميكروباص من حلوان للجيزه

ووصلنا الجيزه حوالي الساعه 2:30 . . . . . (تمااااام)

و المفروض بقى ان احنا نركب عربيه فولكس للهرم

وجت العربيه بسرعه . . و بغض النظر عن ان السواق كان شكله مريب ركبنا العربيه . . (ماهو اصلاً نص السواقين في مصر شكلهم مريب)

و بعدين فوجئنا ببتاع 6 شباب جايين راكبين معانا اتنين قدام جنب السواق وواحد جمبنا واتنين ورا. . و اول ما ركبوا العربيه طلبوا من السواق انه يفقل الباب

رغم ان العربيات دي في العاده بتمشي ببابها مفتوح . . و قالوله عشان البرد و كده

وانطلق السواق بسرعه اسطوريه . .

و فوجئنا بالشخص الكائن جمبنا بيقول للورا . . نشربها دلوقتي . . قام اللي ورا قال له ماشي . . راح فاتح حاجه كانت ملفوفه قام اللي ورا قال له . .

السجاير يللا مش البيره

وقاموا بتوليع عدد من السجاير وعزموا على السواق الذي لم يمانع اطلاقاً وكانهم بيعزموا عليه بعصير قصب مثلاً . . .

وم اقولكوش على السواقه بقى . . تحفففففه

المهم احنا وصلنا الى المكان المنشود و نزلنا من الميكروباص بسرعه شديده

المهم الموقف كان مضحك جداً . . للدرجه دي البانجو بقى عادي جداً . . . و عجبي